Ballkani të enjten zhvillon një prej ndeshjeve më të rëndësishme në rrugëtimin e tyre në Ligën e Konferencës. Pas fitores së parë të arritur në Sivas javën e kaluar, kamioni i Kosovës sot e pret skuadrën turke në Prishtinë.
Një fitore do të rriste gjasat për të kaluar në fazën nokaut të Ligës së Konferencës. Dueli i kthimit mes Ballkanit dhe Sivasporit, do të zhvillohet këtë të enjte prej orës 21:00 në stadiumin “Fadil Vokrri” në Prishtinë dhe i takon xhiros së katërt të kësaj gare.
Fitorja ndaj Sivassporit e ngriti Ballkanin në krye të grupit G me katër pikë, sa i kanë edhe tre kundërshtarët tjerë. Të ekipi suharekas besojnë që mbështetja e madhe që do ta kenë në tribunat do t’i ndihmojë shumë për të arritur rezultat pozitiv ndaj Sivassporit.
Gjithashtu portokallizinjtë kanë njoftuar se tashmë janë shitur të gjitha biletat për këtë ndeshje, dhe një motiv shtesë do të jetë në këtë sfidë të rëndësishme.
Mungesa e vetme te Ballkani për këtë ndeshje, do të jetë ajo e kapitenit Edvin Kuç. Mesfushori është rikuperuar nga lëndimi që e ka mbajtur jashtë fushës për disa javë, por që Ilir Daja nuk dëshiron ta rrezikojë. Në formacionin bazë pritet të kthehet mbrojtësi i krahut të majtë, Astrit Thaqi që mungoi në ndeshjen e shkuar për shkak të suspendimit. /Tëvë1/
