Me gjithë polemikat dhe kritikat që gjeneron, Topi i Artë mbetet çmimi individual më i rëndësishëm në futbollin botëror dhe gara për të fituar çmimin e vitit 2022 ka qenë epike.
France Football njoftoi në mars se rregullat për votimin e Topit të Artë kanë ndryshuar , me kryesorja që çmimi do të bazohet në performancat gjatë një sezoni të vetëm, në vend të një viti kalendarik.
Kjo do të thotë se paraqitjet në Kupën e Botës 2022, e cila do të fillojë në nëntor, nuk do të merren parasysh këtë vit dhe në vend të kësaj do të gjykohen kur të fillojë votimi për Topin e Artë 2023.
Rëndësia e dhënë për trofetë është zvogëluar gjithashtu, që do të thotë se çmimi duhet të pasqyrojë futbollistët më të mirë në çdo sezon, në vend të atyre që ngrenë më shumë tituj.
Fituesi i Topit të Artë për edicionin 2021-22 do të kuptohet këtë të hënë në Paris nga ora 21:00. Padyshim pretendenti kryesor për t`u dekoruar lojtari i vitit është ylli i Real Madridit, Karim Benzema. Francezi ishte vendimtar në një sezon fantastik për të dhe ‘Mbretërit’.
Në 46 takime sa ka zhvilluar gjithsej sezonin 2021-22, Benzema ka shënuar 44 gola dhe 15 asistime në të gjitha gara.
Sulmuesi gjithashtu me Realin ka fituar La Ligan dhe Ligën e Kampionëve, dy nga trofetë më prestigjioz për klube. Rikujtojmë që mbajtës i këtij çmimi aktualisht është Leo Messi, por në këtë edicion nuk gjendet në listën e 30 lojtarëve me të mirë për herë të parë në karrierë. /Tëvë1/
