Selektorit të Kombëtares së Shqipërisë, brazilianit Sylvinho i është ofruar rinovimi i kontratës për të vazhduar bashkëpunimin me Federatën Shqiptare të Futbollit (FSHF).
Këtë e ka zbuluar kreu i FSHF-së, Armand Duka në një intervistë për mediumet e Shqipërisë. Duka ka thënë se synimi i mbajtjes së Sylvinhos edhe për dy vite të tjera, është që ai ta kualifikoj Kombëtaren e Shqipërisë në Kampionatin Botëror të vitit 2026.
“Ne jemi të kënaqur me atë çfarë ka bërë Sylvinho dhe i kemi ofruar rinovimin e kontratës për dy vite të tjera. Synimi kryesor është kualifikimi në Botëror”, ka thënë Duka.
Sylvinho mori drejtimin e Shqipërisë në janar të vitit të shkuar dhe ka kontratë valide deri në fund të këtij viti. Nën drejtimin e Sylvinhos, Shqipëria ka siguruar pjesëmarrjen në “Euro 2024”, ku bën pjesë në Grupin B së bashku me Italinë, Kroacinë dhe Spanjën.
