Selektori i Kombëtares së Shqipërisë, Sylvinho deklaroi në konferencë për shtyp se për Kombëtaren është një moment i mire përballja me Letoninë.
“Është një moment i mirë në Kombëtares. Edhe pse ka presion, kur e ke gjithçka në dorë vetë, është moment i mirë. Zakonisht kur ke rezultat të mirë, gjërat ndryshojnë për mirë. Më shumë sesa duhet të shqetësohem për lojtarët që nuk janë në listat e Europës, shqetësohem për lojtarët që kanë ndryshuar trajner apo ekip. Nuk jemi në atë nivel që të zgjedhim lojtarët që kanë më shumë minuta për të luajtur me ne. Ka ndodhur që kam sjellë një lojtar që në ndeshjet e fundit nuk kishte luajtur dhe kjo nuk më shqetëson”, deklaroi ai.
Sylvinho ishte i prerë në përgjigjen e tij, duke thënë se Shqipëria nuk është Spanja që të fitojë me rezultate të thella.
Po ashtu, ai paralajmëroi se për ndeshjen me Letoninë do të ketë ndryshime në formacion.
“Sigurisht që do të jetë një ndeshje kyçe. Po flasim për gjëra të ndryshme. Ndeshjet për të shkuar në Botëror janë të vështira. Dy ditë më parë pamë ndeshjen Letoni-Serbi. Ishin minuta të forta. Në futbollin modern, rezultate 6-0 ndodhin rrallë. I ndodhin ekipeve si Spanja. Më vjen keq ta them, por nuk jemi në atë nivel”, u shpreh Sylvinho.
Tekniku brazilian vlerësoi lartë Letoninë, ndërsa shtoi se për formacionin ende nuk ka vendosur.
“Letonia është një ekip fizik. Luftojnë gjithmonë për topin e tyre. Janë të mirë në goditjet standarde. Sa i përket ndeshjes me Gjibraltarin, ishte atmosferë ndryshe. Puna me kombëtare është ndryshe nga ajo në klub. Ishte hera e parë që Berisha luajti. Doja t’i shihja lojtarët e rinj. Tu kërkosh atyre 6-0 është e vështirë. Prisja më shumë, por po përgatitemi mirë. Ende nuk kam vendosur për titullarët, por do të ketë ndryshime. Formacionin do e vendos nesër”, tha Sylvinho.
Sylvinho deklaroi se Jasir Asani dhe Armando Broja janë në gjendje optimale dhe shtoi se vetëm njëri prej tyre mund të jetë në formacion të martën mbrëma.
“Asani dhe Broja janë shumë mirë. Në gjendje optimale. Janë lojtarë ndryshe në karakteristika, por shumë të mirë. Kanë besimin tim dhe më pëlqejnë. Ndoshta njëri prej tyre mund të startojë”, shtoi Sylvinho.
Sylvinho foli edhe për ndeshjet e kaluara kurse shtoi se Letoninë duhet patjetër ta mposhtin.
“Ndaj Anglisë kemi bërë mirë. Ndaj Andorrës kemi pasur performancë dhe rezultat të mirë. Ndaj Serbisë kishim lojë, por jo rezultatin. Në ndeshjen e fundit ndaj Letonisë nuk më pëlqeu pjesa e parë. Në raste kur do të shkosh në Botëror, janë gabime që i paguan shtrenjtë. Është një ndeshje kyçe. Çdo ndeshje është shumë e rëndësishme për Botërorin. Edhe ndeshja në Riga ishte po ashtu. Është një ndeshje e vështirë. Duhet të përgatitemi mirë. Jemi një. Duhet të futemi në fushë dhe të marrim fitoren. Edhe pse ka pak presion është ndeshje e rëndësishme”, u shpreh Sylvinho.
