Nënkryetari i OVL-UÇK-së, Gazmend Syla, e ka quajtur puro politik rrëzimin e mocionit të mbrojtjes për hedhjen poshtë të disa pikave të akuzave në gjykimin ndaj Hashim Thaçit, Kadri Veselit, Rexhep Selimit dhe Jakup Krasniqit.
Syla në emisionin “Ditari” në Tëvë1 është shprehur i bindur se as epilogu final i kësaj çështjeje nuk do të jetë pozitiv.
“Nuk është se kemi pritur vendim ndryshe, nuk presim vendim ndryshe nga kjo gjykatë edhe mendojmë se është puro politike, edhe jemi të bindur se edhe vendimi i fundit, pra epilogu final i kësaj çështjeje do të jetë politike. Edhe ne verdiktin final nuk presim se do të vijë ndonjë lajm pozitiv për lirimin e bashkëluftëtarëve tonë por gjasat reale janë duke parë qasjen e kësaj gjykate që ta marrim një lajm të keq populli ynë edhe Ushtria Çlirimtare e Kosovës në këtë proces”, ka thënë ai.
Gjykata Speciale të mërkurën e ka rrëzuar mocionin e mbrojtjes së ish-krerëve të Ushtrisë Çlirimtare të Kosovës për të hedhur poshtë pjesë të caktuara të aktakuzës ndaj tyre për krime të pretenduara lufte.
Kryetari i trupit gjykues, Charles Smith, tha se nuk ka bazë ligjore për të rrëzuar asnjë pjesë të aktakuzës.
“Trupi gjykues e rrëzon mocionin e mbrojtjes, sipas rregullës 130, në tërësinë e tij. Rregullat gjyqësore parashohin kundërshtimin e pikave të aktakuzës si tërësi, dhe jo të pikave të veçanta, ashtu siç ka vepruar mbrojtja”, deklaroi ai.
Sipas gjyqtarit Smith, provat janë shqyrtuar në secilën prej pikave të aktakuzës.
