Ish-këshilltari i ish-presidentit Hashim Thaçi, Ismail Syla, ka reaguar ndaj deklaratës së kryeministrit të Shqipërisë, Edi Rama, i cili gjatë një vizite në Kosovë tha se presidentja Vjosa Osmani ishte kërcënuar nga Zyra e Prokurorit të Specializuar, pasi nuk kishte lejuar që në Presidencë të kërkoheshin prova kundër Thaçit.
Në emisionin “Info Nata” në Tëvë1, Syla e ka cilësuar deklaratën e Ramës si të “kurdisur” dhe si një përpjekje për t’i dhënë “kredi politike” presidentes Osmani në raport me çështjen e Thaçit.
Sipas Sylës, pretendimet për presion apo kërcënim ndaj Osmanit nuk qëndrojnë, pasi, sipas tij, ajo nuk ka qenë asnjëherë në rrezik nga askush.
Ai e ka cilësuar gjithashtu këtë deklaratë si një nga gjestet më të papranueshme të Ramës në karrierën e tij politike.
“Edi Rama e ka kurdisur këtë deklaratë, sepse nuk ka pasur asnjë sekret dhe asnjë rrezik apo presion ndaj Vjosa Osmanit. Kjo ishte një bllof, një përpjekje për t’i dhënë kredi politike. Është gjesti më i shëmtuar i Edi Ramës në karrierën e tij, t’i japë kredi një personi që nuk ka qenë nën presion. Ajo ka vrapuar menjëherë drejt kasafortës, sikur ne të ishim kusarë dhe ta merrnim shtetin me vete. Mos ta bëjnë heroinë një person që për Hashim Thaçin ka thënë se ka kaluar koha kur nuk ka më tregtarë kufijsh; këtë nuk e besojnë as pionerët”, ka deklaruar Syla.
Ndryshe, kryeministri i Shqipërisë, Edi Rama, të hënën gjatë vizitës së tij në Kosovë ka deklaruar se Presidentja Vjosa Osmani është kërcënuar për dy vite me radhë, pasi nuk ka lejuar që prokuroret të dhunojnë institucionin e Presidentit.
Sipas Ramës, këta prokurorë donin të gjenin prova për krime kundër njerëzimit në institucionin e presidentit.
Kreu i qeverisë shqiptare tha se Presidentja Osmani nuk e ka lejuar një gjë të tillë.
“Mund të jetë sekret shtetëror këtu në Kosovë, por nuk është sekret shtetëror për mua, që edhe presidentja e Kosovës është kërcënuar. Është kërcënuar sepse nuk ka lejuar që prokurorët të dhunonin zyrën e institucionit të Presidentit të Kosovës se me demek do kërkoni edhe aty provat e krimeve kundër njerëzimit. Natyrisht do të vendoste Kosovës në sytë e botës ku deri në zyrën e presidentit gjenden prova për krime kundër njerëzimit. Kërcënimi i Presidentes ka zgjatur dy vjet. Për nderin e saj dhe të Kosovës, ajo e ka ndaluar një gjë të tillë”, deklaroi Rama./teve1.info/
