Ministri i Punëve të Brendshme në detyrë, Xhelal Sveçla, të enjten ka pritur në takim një delegacion nga shteti i Iowa-s i Shteteve të Bashkuara të Amerikës, ku është diskutuar mbi marrëdhëniet e shkëlqyera mes dy vendeve, me fokus të veçantë në bashkëpunimin në fushën e sigurisë.
Sipas njoftimit zyrtar, gjatë takimit janë vlerësuar marrëdhëniet e ngushta dhe bashkëpunimi i frytshëm ndërmjet Kosovës dhe shtetit të Iowa-s, të cilat kanë filluar të thellohen dhe rriten gjatë viteve të fundit.
“Ministri Sveçla theksoi rëndësinë e thellimit të këtyre marrëdhënieve dhe bashkëpunimit në fushën e sigurisë, duke vënë në pah iniciativat e përbashkëta për shkëmbimin e përvojave dhe mbështetjen në ndërtimin e kapaciteteve të institucioneve të rendit në Kosovë”, thuhet në njoftim.
Nga ana tjetër, delegacioni i Iowa-s ka shprehur gatishmërinë për të forcuar më tej lidhjet dhe bashkëpunimin me institucionet e Kosovës, duke nënvizuar rëndësinë e partneritetit në promovimin e stabilitetit dhe sigurisë.
“Ky takim tregon rëndësinë e avancimit të marrëdhënieve strategjike ndërmjet Kosovës dhe shtetit të Ioëa-s në fushën e sigurisë dhe rendit publik, sidomos të aspekteve të rëndësishme, siç janë edhe shkëmbimi i përvojave të institucioneve të sigurisë”, theksohet në njoftim./teve1.info/
