Ministri i Punëve të Brendshme, Xhelal Svçla ka thënë se strehimi në Serbi i grupit terrorist që kreu sulmin në Banjskë dhe mos dorëzimi para drejtësisë paraqesin kërcënim për sigurinë e Kosovës.
Ai këto i ka thënë gjatë takimit që ka zhvilluar me takim Sekretarin e Ministrisë së Brendshme Federale të Gjermanisë, Bernd Krosser, i cili ishte i shoqëruar nga ambasadori i Gjermanisë në Kosovë, Jorn Rohde.
“Ministri Sveçla diskutoi edhe për sigurinë e përgjithshme në Kosovë, veçanërisht në komunat veriore. Me këtë rast, ai shprehu shqetësimin për mos dorëzimin para drejtësisë të terroristëve që realizuan sulmin terrorist në Banjskë dhe strehimin që po ua bën Serbia, si një kërcënim i vazhdueshëm për sigurinë e Republikës së Kosovës”, thuhet në komunikatë.
Sipas MPB-së, Sveçla prezantoi të arriturat në fushën e sigurisë, veçanërisht në luftën ndaj krimit të organizuar, kontrabandës, migrimit të parregullt dhe çdo ilegaliteti tjetër. Ai theksoi se këto të arritura janë edhe falë mbështetjes së partnerëve tanë të cilët kanë kontribuar në ngritjen dhe forcimin e institucioneve të sigurisë.
Sekretari Krosser falënderoi Ministrin për pritjen dhe përgëzoi për të arriturat. Ai po ashtu diskutoi edhe për Procesin e Berlinit, ku Republika e Kosovës mbetet palë aktive e këtij procesi. U diskutua po ashtu edhe Ministeriali i radhës i Ministrave të Brendshëm në kuadër të Procesit të Berlinit.
Të dyja palët u dakorduan për bashkëpunim të mëtejmë, si garancë e sigurisë në rajon por edhe më gjerë.
