Asamblisti i LVV-së në Komunën e Prishtinës, Gëzim Sveçla, e ka quajtur aksion simbolik shkuljen e mikrofonit në sallën e mbledhjeve në Komunën e Prishtinës.
Sveçla ka thënë se veprimi i tij ishte i domosdoshëm për ndërprerjen e seancës në të cilën sipas tij do të ndërrmireshin disa vendime dhe që janë shumë të dëmshme për qytetin.
“Nuk bëhet fjalë për kurrfarë vandalizimi të sallës së Kuvendit, bëhet fjalë për një veprim politik , aksion simbolik i cili ishte i domosdoshëm në mënyrë që të paktën përkohësisht të ndërpritet ajo seancë në të cilën do të ndërmerreshin disa vendime dhe që janë shumë të dëmshme për qytetin dhe për banorët e Prishtinës”, ka thënë ai në një konferencë për media.
Sveçla ka thënë se ai do të paraqitet në polici në orën 14:00 për të dhënë shpjegime lidhur me këtë incident.
“Po, jam i ftuar nga Policia e Kosovës në orën 14:00 dhe do të shkoj që të jap deklaratë për këtë rast”, ka thënë ai.
Ndryshe, të hënën asamblisti i LVV-së në komunën e Prishtinës, Gëzim Sveçla, ka demoluar pajisjet në sallën e mbledhjeve në Komunën e Prishtinës. Kjo është bërë e ditur në një video që është postuar nga asamblisti i LDK-së, Egzon Pacolli.
Asamblisti i LVV-së demolon sallën e mbledhjeve në Komunë të Prishtinës
