Ministri i Punëve të Brendshme, Xhelal Sveçla, ka reaguar pas gjetjes dhe konfiskimit të dy raketahedhësve të njohur si “zolla”, të prodhimit serb, në një kompleks banesor të pabanuar në Mitrovicën e Veriut.
Në një postim në rrjetin social Facebook, Sveçla tha se sasia dhe niveli i armatimit të sekuestruar gjatë katër viteve të fundit janë dëshmi e qartë e kërcënimeve me të cilat është përballur vendi.
“Për nivelin dhe sasinë e armatimit të konfiskuar gjatë këtyre katër viteve, të gjithë jemi dëshmitarë,” shkroi Sveçla.
Ai akuzoi Beogradin për ndihmë të drejtpërdrejtë ndaj grupeve kriminale dhe terroriste në veri të vendit, duke theksuar se Serbia nuk është distancuar asnjëherë nga veprimet që cenojnë sovranitetin e Kosovës.
“Beogradi jo vetëm që nuk është distancuar asnjëherë nga këto mjete dhe veprime në veri të vendit, por përkundrazi, për vite me radhë i ka stimuluar, organizuar dhe furnizuar grupet terroriste dhe bandat kriminale – me të vetmin qëllim: cenimin e integritetit territorial dhe rendit kushtetues të Republikës së Kosovës,” shkroi ai.
Sveçla theksoi se institucionet e sigurisë janë të përkushtuara për të çmontuar çdo prani kriminale apo potencial terrorist në vend, duke vepruar sistematikisht dhe pa kompromis.
“Çdo ditë e më shumë po e kthejmë rendin në atë pjesë të territorit dhe, bashkë me të, edhe investimet dhe zhvillimin për të gjithë qytetarët, pa dallim,” përfundoi ai.
