Ministri i Punëve të Brendshme, Xhelal Sveçla, e ka kujtuar heroin Enver Zymberi në 13-vjetorin e rënies së tij në krye të detyrës.
Sveçla ka thënë se heroi Enver Zymberi është kthyer në shembullin dhe motivin e qindra vajzave dhe djemve të Kosovës, që sot, 13 vite pas rënies së tij, shërbejnë në çdo cep të Republikë së Kosovës.
“Në nderim të sakrificës sublime të Hero Enver Zymerit, prej tre vitesh 26 korrikun e shënojmë si Ditën memoriale të policëve të rënë në kryerje të detyrës. Listës së të rënëve, shokëve të tij të lavdisë, këtë vit i është shtuar Heroi Afrim Bunjaku, i vrarë në sulmin terrorist të Serbisë në Banjskë me 24 shtator”, ka shkruar Sveçla në Facebook.
Tutje, Sveçla u është mirënjohës djemve e vajzave që bartin me nder e krenari uniformën e Policisë së Kosovës, të cilët shërbejnë dhe mbrojnë Republikën e Kosovës.
“Sot dhe çdo ditë u jam mirënjohës djemve e vajzave tona që bartin me nder e krenari uniformën e Policisë së Kosovës dhe shërbejnë e mbrojnë Republikën tonë, duke realizuar kështu aspiratat e 23 pjesëtarëve të Policisë së Kosovës të rënë në kryerje të detyrës”, ka thënë Sveçla./teve1.info/
