Ministri i Mbrojtjes, Xhelal Sveçla, i ka reaguar Listës Serbe, për aksionin antidrogë në veri ku u shkatërruan tre laboratorë droge, dhe tha se bashkëpronar i njërit prej laboratorëve të shkatërruar të drogës në veri, është personi i cili sulmoi Policinë e Kosovës në Urën e Bistricës.
Por, Lista Serbe këtë e mohoi duke thënë se Milan Deleviqi nuk është në mesin e të arrestuarve.
Ndërsa, Sveçla në reagimin e tij ka publikuar emrat e tre të arrestuarve si pronarë të këtyre laboratorëve.
Ai ka thënë me laboratorë drogë, kriminel si mjete politike, fasada e tyre nuk zgjatë më shumë se deri te aksioni i radhës i Policisë së Kosovës.
“Qenkan trazuar këtë të diel Lista Serbe dhe Petkovic me disa reagime. Çështja në fjalë është e thjeshtë. Me laboratorë droge, trafikantë e kriminelë si mjete politike, fasada e rrejshme nuk zgjatë më shumë se deri te aksioni i radhës i Policisë së Kosovës. 8 laboratorë droge janë shkatërruar brenda mandatit tonë, vetëm sot janë shkatërruar 3 sosh. Pronarët e tyre: Miljan Delevic, Ivan Slavic, Dusan Slavic e Nikola Filgjokic, janë të përfshirë në sulmet ndaj zyrtarëve të Policisë së Kosovës, në ngritjen e barrikadave e në kërcënimet e sulmet ndaj serbëve që kanë refuzuar të bashkëpunojnë me ta”, ka shkruar Sveçla.
Ai ka publikuar edhe fotografi kur këta persona janë vizituar nga Vuçeviç dhe Petkoviç pas sulmit ndaj Policisë së Kosovës.
“Pas sulmit ndaj zyrtarëve të Policisë së Kosovës këta janë vizituar nga Ministri i Mbrojtjes i Serbisë Milos Vucevic, nga Petkovic ndërsa mbështeteshin e mbroheshin nga Lista Serbe e Milan Radojciq. Ministrat e Serbisë të përfshirë në këto instrumentalizime me banda kriminale sonte do të dëshironin mos të ekzistonin këto foto e video. Por ato ekzistojnë dhe janë dëshmi e fortë se çfarë fshihet pas “politikës” së tyre”, ka shkruar ai.
Policia e Kosovës në një aksion antidrogë në veri ka shkatërruar tre laboratorë ku dy nga ta kishte të mbjellura bimë narkotike, ndërsa njëri kishte pajisje për përpunimin e tyre.
Sipas ministrit Sveçla 2.3 milionë euro ishte vlera e drogës dhe pajisjeve të sekuestruara në veri./teve1.info/