Gjatë prezantimit të Projektligjit, Sveçla tha se pas miratimit të këtij ligji, të gjithë të rinjtë mund të aplikojnë në çdo pozitë në administratën shtetërore, duke i përmbushur kërkesat e konkursit.
“Për reformën në admisnitratën publike dhe adresimin e nevojave të shoqërisë për tu përshtatur me kërkesat e kohës. Administrata e mbyllur dhe pamundësisë për gjithpërfshirje, ndërhyrje politike, punësime me nepotizëm, mungesa e kapaciteteve e të tjera kanë bërë për të reformuar këtë ligj”, tha Sveçla.
Sipas tij, përmes projektligjit të ri do të krijohet një sistem efikas për matjen e performancës dhe llogaridhënies, përfshirjes së grave dhe personave me aftësi të kufizuara.
Ky ndryshim sipas Sveçles po bëhet për të adresuar nevojat e administratës.
Projektligji mbështetet nga deputetët e VV-së të përfaqësuar nga Mimoza Kusari-Lila.
Kurse, Partia Demokratike e Kosovës është shprehur kundër këtij projektligji.
Deputeti Mërgim Lushtaku tha se ligji në fjalë e politizon administratën shtetërore, derisa shtoi se nëpunësit civil i vë në rrezik të punës dhe karrierës.
Lushtaku tha se kundër këtij ligji janë edhe rekomandimet e zyrës së BE-së, të cilat sipas tij nuk janë marrë fare parasysh.
Edhe deputeti i LDK0-së, Agim Veliu, tha se ligji për Zyrtarët Publik është në kundërshtim me Ligjin për Qeverisje Lokale pasi sipas tij, pas 18 muajve Komunave u hiqet e drejta për punësim të stafit.
“Komunat janë pjesë e pushtetit lokal, andaj nuk ka logjikë që një pushtet të rekrutoj stafin e një pushteti tjetër, pasi pushteti qendror nuk e përfshin administratën e komunave”, tha Veliu.
Ndërsa, Besnik Tahiri i AAK-së, tha se me këtë ligj politizohet administrata publike.
“Me këtë ligj karriera e zyrtarëve të administratës varet nga partia në pushtet dhe ministrat”, tha Tahiri.
AAK kërkon që ky ligj mos të votohet.
Kundër projektligjit të ri është shprehur edhe përfaqësuesi i deputetëve të Grupit Parlamentar joshumicë, Enis Kervan.
Ai tha se ky projektligj mund të mbështetet me ndryshimin e disa neneve.
