Ministri i Punëve të Brendshme, Xhelal Sveçla, thotë se zvarritja e zbardhjes së vrasjes së aktivistit, Astrit Dehari, rëndon edhe më shumë dhimbjen.
Sveçla, thotë se drejtësia dhe llogaridhënia për vrasjen e tij janë të pashmangshme.
“Sot bëhen 7 vite pa shokun e bashkëaktivistin tonë Astrit Dehari. Mungesa e tij në mesin tonë është e madhe, teksa zvarritja e zbardhjes së vrasjes së tij rëndon dhimbjen tonë të përbashkët. Drejtësia dhe llogaridhënia për vrasjen e tij janë të pashmangshme”, ka shkruar ministri në Facebook.
Tutje, ai tha se idealet e Deharit do të jenë gjithmonë udhërrëfyese për angazhimet e Lëvizjes Vetëvendosje.
“Astriti, ky aktivist i shquar i dijes dhe i punës, na mungon çdo ditë e më shumë ndërsa idealet e tij janë dhe do të jenë gjithmonë udhërrëfyesi në angazhimet tona të përditshme. Drejtësi për Astritin”, ka shkruar ai.
Sot, bëhen shtatë vjet nga vdekja e Astrit Deharit. Aktivisti i Lëvizjes Vetëvendosje, vdiq më 5 nëntor 2016 në Burgun e Prizrenit, në rrethana ende të paqarta./teve1.info/
