Kandidati i Lidhjes Demokratike të Kosovës për kryetar të Kamenicës, Shaip Surdulli, ka theksuar se një prej prioriteteve të tij kryesore është përmirësimi i shërbimeve shëndetësore në komunë.
Ai ka deklaruar se aktualisht gjendja shëndetësore nuk është e kënaqshme, pasi funksionojnë vetëm tri ambulanta – në Kamenicë, Roganë dhe Hogosht.
“Gjendja shëndetësore nuk është e kënaqshme për shkak se funksionojnë vetëm tri ambulante shëndetësore. Në Roganë funksionon 24 orë dhe ne do ta vazhdojmë punën e asaj ambulante 24 orë, në Hogosht vetëm gjatë ditës dhe më pak është e pajisur. Në Kamenicë duhet të shtohet kapaciteti me një qendër emergjente. Edhe ambulantet nëpër fshatra janë të ndërtuara, por nuk kanë shërbime, janë të mbyllura dhe nuk funksionojnë sepse nuk shkojnë mjekët”, tha Surdulli në emisionin “Info Nata” në Tëvë1.
Ai shtoi se qytetarët po përballen me mungesë të barnave, çka i detyron ata që t’i blejnë vetë edhe trajtimet më bazike.
Ai premtoi se ambulantët nëpër fshatra do t’i funksionalizojë dhe do t’i pajisë me barna esenciale.
“Ka mungesë të barnave, shkon te mjeku, por pastaj duhet t’i blesh të gjitha barnat, edhe për injeksione e infuzione. Duhet të shtohet kontrolli, se me siguri ka barna, por nuk jepen aty. Duhet t’i pajisim ambulantat mjekësore dhe t’i bëjmë funksionale, po ashtu t’i furnizojmë me barna esenciale e jo të mungojë çdo gjë”, tha ai.
Surdulli premtoi se, në rast të fitores në zgjedhjet lokale, do të rrisë cilësinë dhe shërbimin e mjekësisë familjare në komunën e Kamenicës.
