Pas dy fitoreve bindëse në fazën e grupeve të Botërorit të Klubeve, kundër Al-Ain dhe Kazablankës, Juventusi është gati për supersfidën e mbrëmjes së sotme në Orlandon përvëlues ndaj Manchester Cityt.
Të dy skuadrat jane me pikë të barabarta, por bardhezinjtë e drejtuar nga Igor Tudor kanë avantazhin e golavarazhit (9-1 kundrejt 8-0 të ekipit të Pep Guardiolës), çka u jep atyre mundësinë të kualifikohen si të parët në grupin G edhe me një barazim.
Kjo e bën përballjen një ndeshje vendimtare për fatin e grupit, pasi vendi i parë do të thotë përballje më e favorshme në fazën me eliminim direkt, ku Juventusi do të përballet me njërën ndër Real Madrid, Salzburg apo Al-Hilali i trajnerit Simone Inzagi nga grupi H.
Pas dy ndeshjeve të para ku trajneri Tudor zgjodhi të mos bëjë ndryshime në formacion, këtë herë priten disa rotacione në mesfushë. Manuel Locatelli dhe Teun Kopmeiners janë në garë për një vend titullari, ndërsa gjithçka do të varet edhe nga gjendja fizike e Conseicaos, i cili u stërvit veçmas në seancën e fundit për shkak të lodhjes pas sfidës kundër Kazablankës. Në mbrojtje, pritet të konfirmohet treshja Kalulu, Savona dhe Kelly, me portierin Di Gregorio mes shtyllave.
Në repartin ofensiv, Randal Kolo Muani do të jetë sërish në qendër të sulmit. Me vendin e parë në grup në lojë dhe një kundërshtar të kalibrit të Cityt përballë, Juventusi kërkon jo vetëm të ruajë ritmin pozitiv, por edhe të dërgojë një sinjal të fortë për ambiciet në këtë turne prestigjioz.
City i Guardiolës, njësoj si “Zonja e Vjetër”, kërkon që të konfirmojë veten në Kupën e Botës pas një sezoni me shumë ulje dhe ngritje. Të dyja skuadrat janë në një situatë jo fort të mirë sa i përket sezonit që lamë pas dhe Botërorin e shohin si një mundësi të mirë për të rifituar besimin që u ka munguar vazhdimisht.
Gjithçka do të vendoset ditën e sotme në orën 21:00, ku sfida pritet të jetë jo vetëm vendimtare, por edhe spektakolare.
