Superliga e Kosovës rikthehet sot me tri përballje të vlefshme për javën e 10-të të kampionatit, ku pritet rivalitet i lartë në luftën për kreun dhe zonën e mbijetesës.
Në orën 13:00, në Suharekë, Ballkani pret Gjilanin. Nënkampionët renditen aktualisht në vendin e dytë me 18 pikë, katër më pak se liderja Prishtina, dhe kërkojnë fitoren për t’u afruar sërish në krye. Nga ana tjetër, Gjilani ndodhet në vendin e tetë me vetëm 10 pikë, dhe çdo rezultat pozitiv do të kishte peshë të madhe për të dalë nga pjesa e poshtme e tabelës.
Në të njëjtën orë, zhvillohet dueli mes Prishtinës së Re dhe Malishevës. Të dyja skuadrat kanë nevojë urgjente për pikë: Prishtina e Re mban vendin e fundit me vetëm 7 pikë, ndërsa Malisheva pozicionohet në vendin e shtatë me 10 pikë. Një fitore për cilëndo prej tyre do të kishte rëndësi të madhe në garën për mbijetesë.
Ndërkohë, ndeshja kryesore e ditës luhet në mbrëmje, në orën 18:30, ku Prishtina pret Dukagjinin në stadiumin “Fadil Vokrri”.
Kryeqytetasit, që udhëheqin kampionatin me 22 pikë, synojnë të ruajnë ritmin dhe kreun e tabelës. Përballë tyre qëndron Dukagjini, që po zhvillon një sezon solid dhe aktualisht është në vendin e tretë me 14 pikë.
Një fitore e Prishtinës do t’i forconte ata në krye të klasifikimit, ndërsa klubi nga Klina do të kërkojë një rezultat pozitiv për t’u futur fuqishëm në garën për vendet e para.
