Lajmin e ka bërë të ditur Ministria e Kulturës, Rinisë dhe Sportit, së bashku me Komunën e Prishtinës
Festivali do të mbahet në Prishtinë më 4, 5, 6 dhe 7 gusht 2022.
“Deklaratë e përbashkët e Ministrisë së Kulturës (në emër të Qeverisë së Kosovës), Komunës së Prishtinës dhe Sunny Hill Festival.Sunny Hill Festival mbahet në shtëpinë e vet, në Prishtinë, më 4, 5, 6 dhe 7 gusht 2022. Qeveria e Kosovës, Komuna e Prishtinës dhe Sunny Hill Festival bashkojnë forcat për një edicion të mrekullueshëm të festivalit sivjet, aty ku e ka vendin, në Prishtinë”, thuhet në njoftimin e komunës.
Sipas njoftimit, institucionet qëndrore dhe lokale bashkarisht, sipas mandatit që kanë do të ofrojnë mbështetje të plotë për edicionin e sivjetmë, i cili do të mbahet në një lokacion të përshtatshëm.
Festivali “Sunny Hill” do të mbahet edhe në Tiranë në fund të muajit gusht, më 26, 27 dhe 28 gusht.
“Në Prishtinë, Sunny Hill Festival për këtë vit ka përgatitur lineup-in më të fuqishëm nga festivalet e rajonit ku përveç artistëve të njohur si Diplo, Skepta, DJ Regard, AJ Tracey, Mahmood dhe artistët më të njohur shqiptarë, për këtë edicion pritet të zbulohen edhe dy artistë shumë të mëdhenj botëror”, thuhet në njoftim.
Ndryshe, ditë më parë në pamundësi që të marrë në shfrytëzim një tokë prej 17 hektarësh në komunën e Prishtinës për 99 vjet, festivali i muzikës, Sunny Hill Festival, u zhvendos nga Prishtina për në Tiranë.
Ky vendim ishte marrë më 14 qershor.
Në një njoftim që nxiti debat të gjerë në Kosovë, Dukagjin Lipa, themelues dhe organizator i këtij festivali dhe babai i këngëtarës, Dua Lipa, tha se arsye për këtë është zvarritja e procedurës për marrjen në shfrytëzim të një hapësire në komunën e kryeqytetit të Kosovës. Bëhet fjalë për një parcelë në Bërnicë të Poshtme.
Ndërsa, ministri i Kulturës, Hajrullah Çeku ka mohuar të ketë pasur Qeveria e Kosovës propozim për çështjen afatgjate të shfrytëzimit të tokës, por ka shtuar se kanë kërkuar që të ulen dhe të gjejnë zgjidhjen më të mirë./teve1.info
https://teve1.info/lajmet/3ceku-thote-se-ishin-te-angazhuar-per-sunny-hill-flet-per-presion-nga-organizatoret/
