Ka mbi një dekadë që një parti politike e ka shumicën ne Parlamentin serb.
Ajo është Partia Progresive Serbe, e cila udhëhiqet nga Presidenti serb, Aleksandar Vuçiq.
Por përgjatë këtyre dhjetë viteve sa ka udhëhequr partia e Vuçiqit, raporte të ndryshme tregojnë se demokracia në Serbi ka vazhduar të përkeqësohet.
E për situatën politike në Serbi dhe për gjendjen e shoqërisë serbe, e shqetësuar po shprehet e Kryetarja e Komitetit të Helsinkit për të Drejtat e Njeriut në Serbi, Sonja Biserko.
“Fatkeqësisht në Serbi po përsëritet sistemi parti-shtet nga kjo klasë politike që ka udhëhequr mbi një dekadë në krye me Aleksandar Vuçiq. Mediet kryesore janë tërësisht të kontrolluara dhe ato e manipulojnë opinionin publik në Serbi. Përveç medieve, shoqëria civile nuk e ka më ndikimin që e ka pasur dikur. Pra mund të them që jeta politike në Serbi është duke vdekur”, ka thënë Biserko.
Ajo madje akuzon partinë në pushtet se kurrë nuk është distancuar nga trashëgimia e ish-presidentit serb, Slobodan Milosheviq.
“Partia në pushtet kurrë nuk u distancua nga trashëgimia e Millosheviqit. Ju mund ta shihni se janë po ata njerëz te njëjtë që kanë shërbyer edhe gjatë viteve të 90-ta. Serbia akoma vazhdon të jetë një faktor destabilizues në Ballkan, dhe ka pretendime territoriale ndaj shteteve fqinje”, ka shtuar ajo.
Por, Biserko e sheh një situatë krejtësisht tjetër politikë në Kosove.
Sipas saj në Serbi, mungon një model i ri i politikanit siç është Albin Kurti, megjithatë për këtë të fundit thotë se duhet të jetë i gatshëm të bëjë kompromise.
“Unë e njoh Albin Kurtin për më shumë se 25 vjet dhe e di shumë mirë se si është zhvilluar si politikan. Mua më pëlqen guximi dhe integriteti i tij dhe mendoj se ai prezanton një gjeneratë të re të politikanëve që nuk janë të korruptuar. Një model të tillë të politikanit ne nuk e kemi në Serbi. Ai e ka krijuar figurën e një lideri që i duron presionet, por në një moment ai duhet të jetë i gatshëm të bëjë kompromise”, u shpreh Biserko.
Aktivistja për te drejtat e njeriut ka folur edhe për planin franko-gjerman.
Ajo thotë se Kosova dhe Serbia duhet ta nënshkruajnë këtë marrëveshje, sepse ky moment mund të mos vij më.
“Nëse arrihet marrëveshja për planin franko-gjerman atëherë kjo do nënkuptonte një etape të për Serbinë dhe të gjithë rajonin. Agresioni i Rusisë në Ukrainë e ka alarmuar Perëndimin, prandaj tani po shohim një fokus të më madh në procesin e dialogut mes Kosovës dhe Serbisë. Në një moment të caktuar procesi kishte ngecur, tani BE po insiston që marrëveshja të arrihet brenda disa javësh. Palët në dialog duhet ta shfrytëzojnë këtë moment unik, sepse mund të mos përsëritet më”, ka përfunduar ajo.
Biserko për një kohë të gjatë ka avokuar për të drejtat e njeriut duke u bërë kështu njëra ndër aktivistet më të zëshme në Serbi.
Kronika e gazetarit Shpat Blakçori.