Autore:Jona Kelmendi
Televizorët i mblodhi në një vend.
E përbashkëta e tyre, është se të gjithë, u djegën nga rryma.
Në këtë formë e pësoi së fundmi ky biznes në fshatin Koliq të Prishtinës.
Shkak për këtë, sipas pronarit Faton Zeqiri, u bënë ndërprerjet e shpeshta të energjisë elektrike në këtë fshat të Prishtinës.
“Problemi i fundit që na ka ndodh, zero atje në trafo është shtiru edhe gjitha pajisjet na i ka djeg, dikun i kem 6-7 televizorë, 3-4 frigorifer, kemi bo ankesë me na rimbursu, mirpo ne gjithë atë rimbursim e kemi bo me mjete tona dhe kurrfarë përgjegjësie nuk kanë marrë”, thotë ai.
Për këto probleme, Zeqiri thotë se u drejtuan edhe në KEDS.
Problemi me energjinë elektrike është i kamotshëm kemi bërë shumë kërkesa në Keds, dhe si të prishet koha pak këtu menjëherë ndalet rryma, edhe me orar të gjatë dmth deri në 30 orë shkojnë reduktimet. Mundemi me pa televizorët, maqinat e teshave gjitha na u kanë djeg”, tregon ai.
E biznesi i Zeqirit, nuk është i vetmi që e pësoi nga kjo situatë e krijuar me energjinë elektrike në Koliq.
Dëme pësuan edhe banorët e tjerë të fshatit.
Ymer Hajzeri, thotë se i janë djegur disa nga pajisjet kryesore shtëpiake.
Mu kanë prish me shporet me maqinë të enëve, me server e me tona. Kemi bërë kërkesë 100 herë atje në KEDS me na ndrru trafon se e kemi të vogël e s’po e furnizon lagjen, ktu ka banorë kogja shumë, dhe u bë mbingarkesë për rrymë. Tash unë i kom ble të reja me maqinë e me këto por u prishen i thirra këta të servilit, thanë që jo na nuk marrim përgjegjësi se janë prish prej rrymës elektrike, por unë iu kërkova faturat me mi lon edhe me tregu qe janë prish prej rrymës”, shprehet ai.
Hajzeri thotë se nga KEDS, i premtuan kompensim për dëmet e shkaktuara.
“Nga KEDSI e kom marrë një përgjigje ata më kanë thënë që shpenzimet ti kompensojmë, që dy muaj nuk ka kurgjo, me siguri deri sa te shqyrtojnë lëndën shkon kohë pak ma e gat”, tregon ai.
Kjo gjendje e krijuar nga tensioni i dobët dhe mungesa e rrymës, të dielën detyroi banorët të mbajnë një protestë paqësore tek trafo e fshatit.
Ndërsa shtojnë se problemet e tilla, po i detyrojnë ta lëshojnë Koliqin.
