Sulmuesi Rinor Rexhepi është prurja më e re te Kombëtarja U21 e Kosovës, ka njoftuar kreu i Federatës së Futbollit të Kosovës, Agim Ademi.
Ademi ka mirëpritur Rexhepin dhe i ka uruar mirëseardhje të Kosova, ndërsa ka shtuar se 18-vjeçari do të jetë vlerë e shtuar për “Dardanët” e rinj.
Rexhepi është pjesë e ekipit Randers U19 që bën gara në Superligën e Danimarkës kurse Kosovës do ti bashkohet për kualifikimet e radhës.
“Rinori, sulmues qendror i Randers U19 në Superligën e Danimarkës, vjen me përkushtim, pasion dhe potencial të madh si vlerë e shtuar për grupin tonë për kualifikimet e radhës. Besojmë se ky është vetëm fillimi i një rruge të gjatë dhe të suksesshme me fanellën dardane për Rinorin!”, ka shkruar Agim Ademi në Facebook.
Në 25 ndeshje të luajtura në kampionatin U19 të Danimarkës, Rexhepi ka shënuar 8 gola për ekipin e Randersit.
