Asociacioni i Gazetarëve të Kosovës ka dënuar sulmin e protestuesve në veri ndaj veturës së mediumit syri.net, ku i kanë shpuar gomat.
AGK, ka thënë se situata po përshkallëzohet nga çasti në çast, dhe po rrezikon punonjësit medialë, të cilët po punojnë nga veriu.
Sulmi ndaj veturës së ekipit të syri.net është sulmi i katër gjatë ditës së sotme, në drejtim të ekipeve mediale, të cilat po raportojnë për situatën në veri të Kosovës.
“AGK-ja, shpreh shqetësim për kushtet e punës së gazetarëve të cilët po raportojnë nga ajo zonë. Njëherësh, u bën thirrje gazetarëve, kameramanëve, fotoreporterëve dhe shoferëve të ekipeve, të tregojnë kujdes të shtuar gjatë raportimit”, thuhet në njoftim të AGK-së. /teve1.info/
