Nënkryetari i Komunës së Gjakovës, Flamur Fetahaj, është sulmuar fizikisht pasditen e së mërkurës në afërsi të objektit komunal.
Lajmi është konfirmuar për teve1.info nga zëdhënësi i Policisë për Rajonin e Gjakovës, Sheremet Elezaj.
Sipas tij, Fetahaj ka marrë trajtim mjekësor dhe, bazuar në raportet mjekësore, ka pësuar lëndime të lehta trupore.
“Rreth orës 16:10, në afërsi të objektit komunal në Gjakovë, është raportuar një incident fizik, ku një zyrtar komunal është sulmuar nga një person i dyshuar – mashkull kosovar. Zyrtari ka marrë trajtim mjekësor dhe, sipas raporteve, ka pësuar lëndime të lehta”, ka deklaruar Elezaj.
Ai tutje ka bërë të ditur se, nga hetimet fillestare rasti nuk ka prapavijë politike, por dyshohet të ketë ndodhur si pasojë e një mosmarrëveshjeje të mëhershme ndërmjet palëve.
Ndërkq, aktualisht, i dyshuari është në kërkim, ndërsa hetimet janë në vazhdim për zbardhjen e plotë të ngjarjes.
“Sipas hetimeve fillestare, rasti nuk ka prapavijë politike dhe dyshohet se ka ndodhur si pasojë e një mosmarrëveshjeje të mëhershme ndërmjet palëve. Aktualisht jemi në kërkim të personit të dyshuar dhe janë duke u ndërmarr veprimet e nevojshme hetimore për zbardhjen e rastit”, ka njoftuar ai./teve1.info./
