Një fëmijë i moshës 5-vjeçare dyshohet se është sulmuar fizikisht nga edukatorja në “Kopshtin dhe Çerdhe Nina”, në Mitrovicë. Rastin për sulmin ndaj fëmijës e ka denoncuar në Polici nëna e viktimës.
Rasti është konfirmuar nga vetë kopshti, ku përmes një reagimi kanë bërë me dije se sulmi ka ndodhur gjatë ditës së djeshme, nga edukatorja me inicialet A.A., ndaj vogëlushit me inicialet S.I., raporton teve1.info.
Ky sulm është vërtetuar nga shikimi i kamerave, kështu ka thënë pronarja e këtij institucioni, Agnesa Shipoli-Nika.
Pronarja thotë se rastin e ka paraqitur në polici. Shipoli-Nika, tutje ka treguar se ka kontaktuar edhe me vetë të dyshuarën, e cila ka pranuar rastin duke thënë se i njëjti ka ndodhur në afekt, dhe se veprimin e ka bërë “pa dashje”.
“Menjëherë pas pranimit të këtij informacioni kam bërë shiqimin e videokamerave të institucionit meqë rast kam vërtetuar se edukatorja kishte qëlluar fëmiun S.I, me një shuplakë në fytyrë. Më pas kam ftuar edukatoren në fjalë dhe kam kërkuar sqarim lidhur me një sjellje të tillë të kundërligjshme dhe e njëjta ka pohuar se dyshimet e ngritura janë të vërteta dhe një sjellje të tillë e kam bërë në afekt pa qëllim apo pa dashje”, thotë ndër të tjera pronarja e këtij institucioni.
