Forcat irakiane të sigurisë shpërndanë qindra protestues që sulmuan portat kryesore të ambasadës suedeze në kryeqytetin irakian të Bagdadit.
Kjo si revoltë ndaj autoriteteve suedeze që po lejojnë një tjetër djegie të planifikuar të librit të shenjtë mysliman, Kuranit.
Videot e postuara në mediat sociale treguan një numër të madh protestuesish brenda perimetrit të ambasadës suedeze, si dhe tym dhe zjarr të zi që dilte nga ndërtesa.
Forcat e sigurisë të armatosura me shkopinj elektrikë ndoqën protestuesit dhe përdorën topa uji për t’i shpërndarë dhe shuar zjarrin, tha një burim për CNN.
Tre fotoreporterë që punonin me agjencitë ndërkombëtare të lajmeve u arrestuan teksa mbulonin demonstratat, tha për CNN të enjten Ziyad Al-Ajili, kreu i Observatorit të Lirive të Gazetarisë (JFO) me bazë në Irak.
Një gazetar tjetër u rrah nga forcat e sigurisë dhe kamera e tij u shkatërrua, tha Al-Ajili.
Protesta në Suedi, e planifikuar për të enjten, vjen vetëm disa javë pasi një burrë u vuri zjarrin faqeve të Kuranit jashtë xhamisë kryesore të Stokholmit, kështu duke zemëruar besimtarët e fesë myslimane në mbarë botën, përfshirë në Irak.
Sipas AFP, policia suedeze tha të mërkurën se kishte dhënë një leje për një protestë jashtë ambasadës irakiane në Stokholm, me mediat që raportuan se organizatorët kishin planifikuar të digjnin librin e shenjtë mysliman.
