Të prangosur po sillen në gjykatore, dy vëllezërit e akuzuar për terrorizëm.
Jovan dhe Dragisha Viqentijeviq, akuzohen për sulmin në kanalin e Ibër Lepencit në nëntor të vitit të kaluar në Varagë të Zubin Potokut.
Bashkë me ta, në liri do të gjykohet edhe Igor Dimoviq, por ky për armëmbajtje pa leje.
Paraqitja e tyre e parë para Gjykatës, nuk pati deklarim rreth fajësisë.
Kjo pasi mbrojtja e vëllezërve Viqentijeviq, kërkoi përjashtimin e prokurorit të rastit, me arsyetimin se ai ka shpërfillur provat e propozuara nga ta.
“Dëshiroj të parashtroj kërkesën për përjashtim të prokurorit Bekim Kodraliu. Prokurori mos ta merrë si çështje personale sepse kjo është çështje principesh. Unë kam propozuar që të merren video incizimet nga dy objekte dhe të intervistohen së paku katër persona, që të bëhet analiza bazike e stacioneve telefonike që të vërtetohet se nga cila antentë elektrike, Jovani ka pranuar sinjal qe do te tregonte se ku ka qenë. Në asnjë mënyrë nuk është vepruar në bazë të kësaj. Me këtë prokurori e ka shkelur dispozitën 7 të kodit të procedurës penale qe e obligon me kujdes të njëjtë t’i vërtetoj faktet që shkojnë në dobi dhe në dëm të të pandehurit”, tha avokati i të akuzuarit Jovan Viqentijeviq.
Në mesin e provave të propozuara nga mbrojtja e Dragisha Viqentijeviq, ishin edhe dëshmitarët për alibi.
“Ia kam paraqitur kërkesën prokurorirt special që t’i thërras katër dëshmitarë të alibisë të Dragishës. Po ashtu kam proprozuar që të mblidhen video incizime nga dy objekte dhe stacionit policor në Zubin Potok, një orë para dhe një orë pas eksplodimit. Deri më sot, prokurori special nuk ka vepruar sipas kërkesës sime” u shpreh avokati i të akuzuarit Dragisha Viqentijeviq
Një përgjigje për këto prova e pati prokurori i rastit, Bekim Kodraliu.
Ai tha se verifikimi i një pjese të provave të propozuara u pamundësua nga mosbashkëpunimi i shtetit serb.
“Komunikimet telefonike të të pandehurit kanë qenë përmes telekomit të Serbisë dhe ne autoriteteve serbe iu kemi drejtuar dy herë për bashkëpunim ndërkombëtar, por përkundër kësaj ne nuk kemi pranuar përgjigje nga ta. Ne nuk kemi mundur në atë fazë të vlerësojmë se kush mund të jetë dëshmitarë dhe kush i dyshuar në këtë rast penal. Hetimet i kemi zhvilluar me bashkëpunim ndërkombëtar dhe partnerë ndërkombëtar dhe në këtë faze kemi vlerësuar se dëshmitarët që i ka propozuar mbrojtja nuk paraqesin ndonjë relevancë që do të ndihmonin në ndriçimin e rastit”, tha Prokurori Special Bekim Kodraliu.
Kodraliu, theksoi se sulmi ishte planifikuar dhe realizuar deri në përsosmëri.
“E di që ndoshta nuk iu pëlqen hetimi që unë kam bërë në këtë rast, por i njoftoj palët se sulmi terrorist ka qenë sulm profesional dhe ka qenë i koordinuar në mënyrë të përsosur”, tha ai.
Në bazë të kërkesës së mbrojtjes, seanca fillestare u ndërpre.
“Na obligon dispozita e nenit 42 të Kodit të procedurës penale, që në rast të paraqitjes së kërkesës për përjashtim qoftë të gjyqtarit apo prokurorit, menjëherë duhet të ndërpritet çdo veprim procedural në një çështje penale derisa të shqyrtohet dhe të merret vendim në lidhje me kërkesën për përjashtim” sqaroi gjyqtari Vesel Ismajli.
Dragisha dhe Jovan Viqentijeviq, akuzohen se vendosën në kanal të Ibër Lepencit 20 kg lëndë eksplozive që shërbejnë për përdorim ushtarak, me qëllim të dëmtimin të infrasrukturës kritike, që do të pengonte furnizimin me ujë të KEK duke çuar pastaj në ndërprerje të energjisë elektrike.
Vëllezërit akuzohen po ashtu edhe për armëmbajtje pa leje.
Kurse Jovan Viqentijiveq, akuzohet edhe për spiunazh, pasi sipas Prokurorisë Speciale ai nga data e pacaktuar deri më 1 dhjetor 2024, data e arrestimit të tij, ka shërbyer si agjent i BIA-s serbe duke dërguar informacione të ndjeshme për territorin e Kosovës.
