Autori: Adea Mustafaj
Palët kanë zënë vendin.
Pas pak, në Gjykatën Themelore në Prishtinë, do të sillen dy të akuzuar për veprën penale të terrorizimit.
E nuk vonoi shumë, me pranga në duar në gjykatore u sollën Dragisha e Jovan Viqentijeviq.
Të dy vëllezërit, po akuzohen për sulmin në kanalin e Ibër-Lepencit me 29 nëntor 2024.
Seanca fillestare nisi me pyetjen e kryetarit të trupit gjykues, se a ndihen fajtor për këtë vepër.
“Dëshiroj të deklaroj se nuk ndihem fajtor për veprën penale, e cila më vihet barrë”, tha ai.
Fjalën e mori sërish kryetari i trupit gjykues, Vesel Ismaili.
“Seanca e shqyrtimit fillestar me kaq përfundon. Të akuzuarit që nga sot, ju njoftoj, pasi të akuzuarit nuk e pranuan fajësinë për veprat penale që akuzohen, ju keni të drejtë ligjore që nga sot të ushtroni në formë të shkruar kërkesë për hedhjen e aktakuzës, kundërshtimin e provave brenda afatit ligjor prej 30 ditësh. Gjykata do t’i shqyrtojë, do t’i analizojë dhe do marrë një vendim lidhur me kërkesat tuajaj”, ka thënë Ismaili.
Por, avokati i Jovan Viqentijeviqit, Nebojsha Vllajiq, kishte një kërkesë për trupin gjykues.
“Lidhur me kërkesat për hedhjen e aktakuzës dhe kundërshtimin e provave ne do t’i parashtrojmë në këtë gjykatë në formë të shkruar brenda afatit, por njëkohësisht do ushtrojmë kërkesë për bashkimin e procedurës penale ndaj të mbrojturit që po zhvillohet në Gjykatën Themelore të Pejës”, u shpreh Vllajiq.
Kundër kësaj, doli prokurori special, Bekim Kodraliu.
“Ai (avokati) është profesionist dhe duhet t’i kuptojë disa çështje juridike. Procedura penale në Pejë është duke u zhvilluar, është procedurë nën hetim dhe nuk ka mundësi ligjore që e njëjta lëndë të bashkohet me lëndën që është vetëm duke u zhvilluar. Ne nuk mund të ndërhyjmë në kompetenca të Gjykatës Themelore në Pejë, ngase do të pengonim hetimin në Pejë”, tha ai.
Sipas aktakuzës së Prokurorisë, vëllezërit Dragisha dhe Jovan Viqentijeviq më 29 nëntor 2024, rreth orës 18:50, ne fshatin Varagë, Komuna e Zubin Potokut, kanë vendosur eksploziv në pjesën e kanalit të “Ibër- Lepencit”, infrastrukturë publike, e cila shërben për furnizimin me ujë të pijshëm dhe nevoja të Korporatës Energjetike të Kosovës për prodhim të energjisë elektrike.
