Prokuroria Themelore në Gjakovë ka njoftuar se është arrestuar personi i dyshuar për sulmin me armë zjarri ndaj një autobusi me udhëtarë në fshatin Pagarushë të Malishevës.
Sipas njoftimit zyrtar, i arrestuari është personi me inicialet S.M., i cili me vendim të Prokurorit të Shtetit është ndaluar për 48 orë.
Ai dyshohet për kryerjen e veprave penale “Vrasja e rëndë në tentativë” dhe “Mbajtja në pronësi, kontroll ose posedim të paautorizuar të armëve”, sipas Kodit Penal të Republikës së Kosovës.
Në njoftimin e Prokurorisë thuhet se:
“Me vendim të Prokurorit të Shtetit, personi i dyshuar me inicialet S.M., është ndaluar për 48 orë, për shkak të dyshimit të bazuar se ka kryer veprat penale ‘Vrasja e rëndë në tentativë’ dhe ‘Mbajtja në pronësi, kontroll ose posedim të paautorizuar të armëve’ sipas Kodit Penal të Republikës së Kosovës.”
Prokuroria ka bërë të ditur se brenda afatit ligjor do të kërkojë caktimin e masës së paraburgimit ndaj të dyshuarit.
“Prokurori i Shtetit, brenda afatit ligjor, do të paraqesë në gjykatën kompetente kërkesën për caktimin e masës së paraburgimit ndaj të dyshuarit”, thuhet në njoftim.
Tutje, Prokuroria Themelore në Gjakovë ka theksuar se, në bashkëpunim me Policinë e Kosovës, po vazhdon hetimet për zbardhjen e plotë të rastit dhe mbledhjen e provave relevante.
“Prokurori i Shtetit në bashkëpunim të ngushtë me Policinë e Kosovës, është duke i ndërmarrë të gjitha veprimet e nevojshme hetimore dhe duke mbledhur provat relevante lidhur me këtë rast.”
Rasti ka ndodhur gjatë ditës së enjte në fshatin Pagarushë të Komunës së Malishevës, ku ndaj një autobusi me udhëtarë dyshohet se është shtënë me armë zjarri të tipit kallashnikov. Hetimet për motivet dhe rrethanat e ngjarjes janë në zhvillim.
