Deklarimet e qeveritarëve karshi punës së institucioneve të drejtësisë, po vlerësohen se vijnë me qëllim të mbulimit të dështimeve të tyre. Në vend të kësaj, nga qeveritarët kërkohet që të fokusohen në fuqizimin e institucioneve të drejtësisë.
Institucionet e drejtësisë në Kosovë, vazhdojnë të kritikohen nga akterë të pushtetit.
Kësaj radhe, zëvendësministri i Drejtësisë, Blerim Sallahu shpërndau një status në rrjetin social facebook, ku Prokuroria Speciale e Kosovës cilësohej si organizatë kriminale.
Ky veprim i Sallahut, solli kundërreagim nga KPK dhe Zyra e Kryeprokurorit të Shtetit, të cilat potencojnë se deklarimet e tilla me përmbajtje nxitëse dhe linçuese, krijojnë pasiguri për prokurorët dhe familjet e tyre.
Edhe kryeministri Kurti në mbledhje të Qeverisë, Gjykatën Kushtetuese e vlerësoi si autoritet që po bllokon reformat e Qeverisë.
Deklarimet e tilla vlerësohen se bëhen me qëllim të ndërrimit të vëmendjes.
“Sulmi ndaj institucioneve të drejtësisë nga ana e Qeverisë është kryekëput një tendencë për të mbuluar mosarritjet ose mospërmbushjet e qëllimeve të cilat i kanë pasur në planprogram, respektivisht dështimet e tyre sa i përket fuqizimit dhe forcimit dhe reformës në sistemin e drejtësisë”, tha Anton Nrecaj nga Instituti Clard.
Në anën tjetër, fokus i qeveritarëve konsiderohet se do duhej të ishte fuqizimi i institucioneve të drejtësisë.
“Këta pushtetarë në vend që të punojnë në ndërtimin e mekanizmave përkatës dhe në fuqizimin e institucioneve në mënyrë që ta bëjnë sa më mirë punën e tyre, fatkeqësisht të njëjtit kanë zgjedhur rrugën që t’i kritikojnë dhe në njëfarë formë t’i etiketojnë për punën që ky sistem i drejtësisë është duke e bërë”, tha Flamur Kabashi nga IKD-ja.
Deklarime të tilla për organet e drejtësisë, ka pasur edhe më herët nga akterë të Qeverisë.
