Forcat ajrore të Izraelit vranë të paktën 58 palestinezë në sulme të reja në Gaza gjatë 24 orëve të fundit dhe plagosën shumë të tjerë, thanë autoritetet lokale të shëndetësisë të shtunën.
Sulmet e fundit erdhën ndërsa Presidenti i SHBA-së Donald Trump përfundoi turneun e tij në Lindjen e Mesme të premten pa ndonjë përparim të dukshëm drejt një armëpushimi të ri.
“Që nga mesnata, kemi marrë 58 martirë, ndërsa një numër i madh viktimash mbeten nën rrënoja. Situata brenda spitalit është katastrofike”, tha drejtori i Spitalit Indonezian në Gazën veriore, Marëan Al-Sultan.
Autoritetet lokale të shëndetësisë thanë se 459 persona ishin plagosur në sulmet izraelite në 24 orët e fundit.
Ushtria izraelite tha se po kryente sulme të gjera dhe po mobilizonte trupa si pjesë e përgatitjeve për të zgjeruar operacionet në Rripin e Gazës dhe për të arritur “kontroll operacional” në zonat e enklavës palestineze.
Përshkallëzimi, i cili përfshin edhe grumbullimin e forcave të blinduara përgjatë kufirit, është pjesë e fazave fillestare të “Operacionit Karrocat e Gideonit”, të cilin Izraeli thotë se synon mposhtjen e Hamasit dhe marrjen e pengjeve të tij./reuters
