Presidenti amerikan, Donald Trump do ta pres në resortin e tij, Mar-a-Lago, në Florida të hënën në mbrëmje kryeministrin izraelit, Benjamin Netanyahu, mes frikës në rritje se Izraeli mund të nisë ofensiva të reja kundër vendeve rajonale, duke e zhytur potencialisht Lindjen e Mesme në paqëndrueshmëri të mëtejshme.
Kryeministri izraelit u largua nga Izraeli të dielën në vizitën e tij të pestë për të takuar Trump në SHBA këtë vit.
Në krye të axhendës do të jetë armëpushimi në Gaza, i cili u arrit në tetor të këtij viti me ndërmjetësimin e Trump, dhe zbatimi i fazës së dytë të planit 20-pikësh të presidentit që llogaritet të jetë sfidues.
Ekziston gjithashtu frikë se Izraeli do të nisë ofensiva të reja kundër Hezbollahut në Liban, duke shkelur një armëpushim të vendosur më shumë se një vit më parë, ose kundër Iranit, të cilin e akuzon për përshpejtimin e prodhimit të raketave balistike në muajt e fundit.
Të premten, agjencia amerikane e lajmeve Axios raportoi se zyrtarët e lartë të Trump po frustroheshin gjithnjë e më shumë “ndërsa Netanyahu ka ndërmarrë hapa për të minuar armëpushimin e brishtë dhe për të penguar procesin e paqes”.
Analistët në Izrael dhe jashtë shtetit pajtohen me këtë, shkruan Guardian.
Ndërkohë, sulmet izraelite në Gaza kanë vazhduar gati pandërprerë që nga tetori megjithë armëpushimin e dakorduar.
Tre palestinezë u plagosën të hënën në sulmet ajrore izraelite në Rripin e Gazës, duke shënuar shkeljen e fundit të marrëveshjes së armëpushimit, sipas mjekëve.
Një burim mjekësor i tha Anadolu-t se tre persona u plagosën kur sulmet izraelite goditën kampin perëndimor të refugjatëve në Jabalia, një zonë nga e cila forcat ushtarake janë tërhequr sipas marrëveshjes së armëpushimit.
Në javët e fundit, shirat e rrëmbyeshëm dhe temperaturat e ulëta kanë përkeqësuar vuajtjet në Gaza, ku shumica e banesave dhe infrastrukturës janë dëmtuar rëndë ose janë rrafshuar me tokë nga sulmet izraelite gjatë luftës dy-vjeçare./teve1
