Sulmet izraelite në Liban sot kanë vrarë të paktën 12 persona, sipas Agjencisë Kombëtare të Lajmeve të Libanit, citon Al Jazeera.
Ato përfshijnë gjashtë persona të vrarë në një sulm që goditi një ndërtesë banimi në Baalbek dhe gjashtë në sulme në zonat Aramoun dhe Saadiyat në jug të Bejrutit.
Njëzet e tre të tjerë janë plagosur në serinë e sulmeve dhe dy të tjerë rezultojnë të zhdukur.
Media shtetërore libaneze raporton se ushtria izraelite ka përparuar më tej në territorin libanez nga pozicionet përgjatë kufirit.
Ushtria izraelite kishte hyrë në qytetin Khiam në Libanin jugor, rreth 6 km nga kufiri, raportoi media shtetërore, duke thënë se qyteti po përjetonte granatime të vazhdueshme.
Ndwrkohw, Haneen Sayed, ministrja libaneze e çështjeve sociale, ka thënë për Al Jazeera se 65,000 njerëz janë regjistruar në strehimore pasi janë zhvendosur nga sulmet e fundit izraelite.
Sayed, ministria e të cilit është përgjegjëse për ofrimin e strehimit dhe furnizimeve për të zhvendosurit, tha se ndoshta 10,000 deri në 20,000 të tjerë ishin zhvendosur gjithashtu, por ishin “në rrugë” ose duke u strehuar te miqtë dhe familja, dhe ishin ende në proces të regjistrimit për mbështetje.
“Nuk është një situatë e mirë. Njerëzit janë të shqetësuar”, tha ajo, duke shtuar se kujtimet ishin ende të freskëta nga lufta me Izraelin në vitin 2024, kur “zgjoheshin çdo ditë me tingujt e dronëve ose shpërthimeve”.
