Parlamenti i Suedisë miratoi të enjten uljen e moshës minimale të përgjegjësisë penale në 14 vjeç, raportuan mediat vendase.
Sipas ligjit të ri, fëmijët 14-vjeçarë tani mund të dënohen me burg për krime tepër të rënda, si vrasje, përdhunim i rënduar dhe vepra me armë të rënda.
Propozimi kaloi me 281 vota pro dhe 66 kundër, ndërsa dy deputetë munguan gjatë votimit.
Qeveria, së bashku me Demokratët e Suedisë të krahut të djathtë, fillimisht kishin synuar që mosha të zbriste në 13 vjeç, por më vonë hoqën dorë nga kjo ide, pasi konstatuan se nuk kishte mbështetje të mjaftueshme në parlament.
Lideri i Demokratëve të Suedisë, Jimmie Akesson, e vlerësoi vendimin, duke e cilësuar atë si “një hap në drejtimin e duhur”.
Gjatë seancës së jashtëzakonshme, parlamenti miratoi gjithashtu masa më të ashpra për emigracionin familjar dhe eliminoi uljet e dënimeve për personat e dënuar për disa vepra penale.
Masa për kufizimin e emigracionit familjar u miratua me 176 vota pro dhe 171 kundër.
Ndër të tjera, ajo parashikon që një individ që jeton në Suedi duhet të ketë leje qëndrimi për të paktën dy vjet përpara se një i afërm të fitojë të drejtën e qëndrimit përmes lidhjeve familjare.
Me po të njëjtën diferencë votash, parlamenti votoi për shfuqizimin e “zbritjes sasiore”, një praktikë që deri më tani u lejonte të dënuarve për disa krime të përballeshin me dënime më të shkurtra me burg.
Nga tani, ata që dënohen për vepra të shumta penale do të përballen me dënime më të gjata.
