Përzgjedhësi i Suedisë në futboll, Jon Dahl Tomasson, e nisi konferencën për shtyp para ndeshjes me Kosovën duke u arsyetuar për nisjen jo të mirë të kampanjës kualifikuese për Kupën e Botës 2026.
Humbja 2:0 në shtëpi nga Zvicra të premten, i ka goditur rëndë suedezët. Ka pasur kritika të shumta për selektorin Tomasson, e për disa prej futbollistëve. Dhe suedezët tani kërkojnë të reagojnë.
Ndeshja Suedi – Kosovë luhet të hënën nga ora 20:45.
“Si trajner nuk mund të flesh. Ka qenë një natë e gjatë pas disfatës, por më pas nis të mendosh për ndeshjen e ardhshme. Presioni gjithmonë është i pranishëm, por ky është futbolli”, ka thënë Tomasson të dielën në konferencën për shtyp.
“E kuptoj se tifozët janë të dëshpëruar. Futbolli është me plot emocione dhe audienca e dëshiron më të mirën për ne”.
Të gjithë lojtarët e Suedisë do të jenë të gatshëm për lojë, kanë njoftuar mediumet në këtë vend. Viktor Johansson do të jetë në portë, ndërsa Viktor Gyokeres dhe Alexander Isak – të dy të pranishëm në konferencën për shtyp të dielën – do të jenë titullarë po ashtu.
“Ne lojtarët e kemi të qartë dhe jemi vetëkritikë pas ndeshjeve të cilat nuk i fitojmë apo nuk paraqitemi mirë. Unë i dëgjoj gjithë lojtarët kur bisedojnë pas ndeshjeve jo të mira. E shohim veten në pasqyrë”, ka thënë Isak.
Edhe Gyokeres nuk ishte i lumtur me fillimin e kualifikimeve.
Suedia është në pozitën e fundit të Grupit B me një pikë. Para Suedisë është Sllovenia me dy pikë, kurse Kosova ka katër pikë në vendin e dytë. E para është Zvicra me nëntë pikë nga tri ndeshje të luajtura.
“Në disa ndeshje nuk i kemi zgjidhur mirë situatat dhe mendoj se kjo nuk është mënyra se si ne luajmë”, theksoi Gyokeres.
Kjo është hera e parë prej vitit 2009 që përfaqësuesja e Suedisë luan ndeshje zyrtare në stadiumin
“Ullevi” në Goteborg. Suedia e kishte fituar ndeshjen ndaj Maltës me rezultatin 4:0.
Në Suedi kanë raportuar se stadiumi me 37 mijë tifozë do të jetë i mbushur plot.
