Pas Federatës së Futbollit të Kosovës (FFK), Suedia është pala tjetër që do të paraqesë ankesë në Gjykatën e Arbitrazhit Sportiv (CAS) për vendimin e UEFA-s që i dha fitoren 3:0 Rumanisë ndaj Kosovës.
UEFA të mërkurën publikoi vendimin për ndeshjen e ndërprerë në Bukuresht në minutat shtesë kur rezultati ishte 0:0.
Kombëtarja e Suedisë që këtë kampanjë të Ligës së Kombeve e mbylli me 16 pikë, po shpresonte që UEFA të mos i jepte tri pikë Rumanisë, pasi do të ishin skuadra e para e Ligës C dhe do të kishin gjasa të mira për të qenë pjesë e plejofit për Botërorin 2026.
Mirëpo, me vendimin e UEFA-s, Rumania tani ka 18 pikë dhe është në avantazh ndaj Suedisë dhe si kombëtarja më e mirë e Ligës C do të përfshihet në plejofin e Botërorit 2026.
Zyrtarët e federatës suedeze kanë bërë të qartë se vendimin e UEFA-s për rastin Rumani – Kosovë, do të kundërshtojnë në CAS.
“Pas fitores së pastër ndaj Azerbajxhanit, kemi pritur njoftimin e UEFA-s lidhur me rezultatin e ndeshjes Rumani-Kosovë. Tani është marrë një vendim, i cili për ne është negativ. Vendimi prek kryesisht skuadrat e përfshira, por ne po shqyrtojmë opsionet për ta kundërshtuar. Është për të ardhur keq që gjërat që ndodhën jashtë fushës kanë ndikim në rezultatin sportiv dhe prekin të dyja skuadrat e përfshira, por edhe neve”, ka thënë Kim Kallstrom, menaxher i Federatës Suedeze të Futbollit.
Ankesë në CAS tashmë ka paralajmëruar edhe Federata e Futbollit të Kosovës.
