Një stuhi e fuqishme me breshër goditi Kroacinë të martën, duke shkaktuar dëme të mëdha në qytetin bregdetar të Splitit.
Erërat e forta shkulën pemë dhe dëmtuan çati ndërtesash, përfshirë edhe stadiumin e futbollit “Poljud”.
Një traget që u shkëput nga ankorimi për shkak të stuhisë u përplas me dy anije të tjera, duke fundosur njërën prej tyre, e cila ishte e zbrazët.
Të paktën tre persona mbetën të plagosur në këtë stuhi që përfshiu qytetin për një kohë të shkurtër, por me intensitet të lartë, raporton AP.
Fotografi të publikuara nga mediat lokale tregojnë pemë të rrëzuara dhe rrugë të përmbytura në Split.
Shërbimi meteorologjik lokal tha se stuhitë e tilla janë të zakonshme pas periudhave të zgjatura të vapës dhe nxehtësisë ekstreme.
Gjatë ditëve para stuhisë, Kroacia dhe pjesë të tjera të Ballkanit përjetuan temperatura që kalonin 40°C.
Meteorologët parashikojnë një rënie të ndjeshme të temperaturave në ditët në vijim, deri në rreth 20°C në disa zona.
Në Slloveni, reshje të dendura shiu dhe breshëri u shënuan në pjesën më të madhe të vendit, ndërsa në Alpet sllovene ka rënë borë në lartësi të mëdha.
Pas Kroacisë, stuhia goditi edhe Bosnjën dhe Serbinë, duke shkaktuar ndërprerje të përkohshme në trafikun ajror në aeroportin e Beogradit.
Pamjet e shpërndara në rrjetet sociale treguan një vinç që u rrëzua në një kantier ndërtimi në kryeqytetin serb. Sipas autoriteteve, të paktën një person u plagos në Beograd si pasojë e motit të keq.
Ndërkohë, reshjet e shiut në Serbi u panë si një lehtësim i përkohshëm, pasi vendi po përballet me një thatësirë të rëndë këtë verë. Më shumë se 600 zjarre të egra u raportuan të hënën, të cilat lanë të plagosur gjashtë persona dhe rrezikuan shumë fshatra.
Autoritetet deklaruan gjendje emergjente në të paktën tre komuna në jug të vendit, ndërsa policia u bëri thirrje qytetarëve të jenë të kujdesshëm për shkak të kushteve të rrezikshme për përhapjen e zjarreve.
Instituti meteorologjik i Serbisë paralajmëroi gjithashtu për nivele të ulëta uji në lumenjtë më të mëdhenj të vendit, Danubin dhe Savën.
