Pirja e kafesë mund të ndihmojë në mbrojtjen e njerëzve nga rrahjet e parregullta të zemrës, pavarësisht bindjes së përhapur se ajo mund t’i shkaktojë, sipas një studimi të ri klinik.
Studimi “A e shmang eliminimi i kafesë fibrilacionin (pa kafeinë)” zbuloi se pacientët me rrahje të vazhdueshme të parregullta të zemrës kishin një rrezik dukshëm më të ulët që gjendja të përsëritej, nëse i përkisnin grupit që konsumonte kafe, krahasuar me ata që e shmangnin atë, përkatësisht 47% kundrejt 64%.
Rezultatet, të botuara të dielën në Revistën e Shoqatës Mjekësore Amerikane dhe të paraqitura në konferencën e Shoqatës Amerikane të Zemrës në New Orleans, sugjerojnë se kafeina mund të ketë një efekt mbrojtës për zemrën.
Kërkimi, i udhëhequr nga kardiologu Gregory Marcus dhe ekipi i tij në Universitetin e Kalifornisë, San Francisko, vjen në një kohë kur mbi 10 milionë amerikanë vuajnë nga fibrilacioni atrial, një çrregullim që shkakton palpitacione dhe mund të çojë në dështim të zemrës, mpiksje gjaku apo goditje në tru.
Tradicionalisht, mjekët u kanë këshilluar pacientëve me këtë gjendje të shmangin kafen me kafeinë, nga frika se ajo mund të nxisë rritje të rrahjeve të zemrës. Por rezultatet e reja mund të çojnë në rishikimin e kësaj këshille.
Në këtë studim gjashtëmujor morën pjesë të rritur të moshuar nga SHBA-ja, Kanadaja dhe Australia, të cilët kishin konsumuar rregullisht kafe gjatë pesë viteve të fundit. Pjesëmarrësit u ndanë në mënyrë të rastësishme në dy grupe: ata që e kufizuan kafenë dhe ata që pinin të paktën një filxhan në ditë. Konsumi u raportua vetë nga pjesëmarrësit gjatë kontrolleve të rregullta me video.
Për të gjurmuar rrahjet e zemrës, studiuesit përdorën elektrokardiograma dhe pajisje monitorimi të veshshme. Ata zbuluan se personat që pinin kafe kishin 17% më pak gjasa të përjetonin përsëritje të fibrilacionit atrial dhe se, mesatarisht, kalonte më shumë kohë para se të ndodhte episodi i parë.
Marcus deklaroi për NBC News se “rezultatet tregojnë sa mbrojtëse mund të jetë kafeja me kafeinë për të parandaluar fibrilacionin atrial”.
Megjithatë, studimi kishte disa kufizime, përfshirë ndikimin e mundshëm të kafeinës nga burime të tjera, si dhe mungesën e të dhënave mbi ndryshimet në dietë apo aktivitet fizik gjatë periudhës së kërkimit.
Ndërkohë, kardiologia Johanna Contreras nga spitali Mount Sinai Fuster Heart në Nju Jork tha për NBC se gjetjet tregojnë se personat me fibrilacion atrial mund të pinë kafe me moderim.
“Ky studim tregon se është në rregull të pish një filxhan kafe në mëngjes, edhe nëse ke fibrilacion atrial,” tha ajo.
