Studentët kinezë në Shtetet e Bashkuara po përballen me pasiguri për të ardhmen e tyre pasi Sekretari i Shtetit amerikan, Marco Rubio, njoftoi të mërkurën se disa prej tyre do të përballen me revokim të vizave.
Sipas deklaratës, SHBA do të fillojë të revokojë vizat për studentët kinezë të cilët studiojnë në “fusha kritike” apo kanë lidhje me Partinë Komuniste Kineze.
Ky vendim ka ngjallur shqetësime të mëdha mes komunitetit të studentëve kinezë, të cilët përbëjnë grupin e dytë më të madh të studentëve ndërkombëtarë në SHBA, pas Indisë.
Gjatë vitit akademik 2023–2024, mbi 270,000 studentë nga Kina studionin në SHBA, duke përbërë rreth 25% të studentëve ndërkombëtarë në vend.
“Ky është një version i ri i Aktit të Përjashtimit të Kinezëve,” tha Linqin, një student në Universitetin Johns Hopkins, i cili preferoi të mos përmendej me mbiemër për shkak të frikës nga hakmarrja.
Ai shtoi se kjo ishte hera e parë që kishte menduar të largohej nga SHBA-ja, pasi kishte kaluar një të tretën e jetës atje.
Ministria e Jashtme e Kinës reagoi ashpër të enjten, duke e quajtur vendimin të padrejtë dhe diskriminues. Zëdhënësja Mao Ning tha se kjo masë zbulon hipokrizinë e pretendimeve të SHBA-së për liri dhe hapje dhe konfirmoi se Pekini ka paraqitur një protestë zyrtare ndaj Uashingtonit, raporton AP.
Çështja e vizave për studentët kinezë ka qenë një pikë e vazhdueshme tensioni në marrëdhëniet SHBA-Kinë. Qysh në vitin 2019, gjatë presidencës së Donald Trump, Ministria e Arsimit e Kinës paralajmëroi për vështirësitë që studentët e saj hasnin në marrjen e vizave amerikane, përfshirë rritjen e rasteve të refuzimit dhe shkurtimin e periudhave të vlefshmërisë së vizave.
Vitin e kaluar, Kina protestoi për mënyrën se si disa studentë të saj ishin ndaluar dhe pyetur në mënyrë të padrejtë në aeroportet amerikane, përpara se të ktheheshin pas në vend.Stu
