Parlamenti i Studentëve të Universitetit të Prishtinës ka njoftuar se më 15 shkurt do të mbajë marsh kundër themelimit të Asociacionit.
Në njoftimin e publikuar në Facebook, studentët e Universitetit “Hasan Prishtina” kanë bërë të ditur se grumbullimi do të nisë në orën 16:00 te Biblioteka Kombëtare.
Ky marsh mbanë moton “Bashkë kundër Asociacionit”.
“Ndonëse në rrethana krejtësisht të ndryshme, përsëri është i domosdoshëm mobilizimi e organizimi studentor për të kundërshtuar një të keqe që po provohet të instalohet brenda shtetit tonë. Asociacioni një etnik është në kundërshtim me Kushtetutën e Republikës sonë. Kështu sepse asociacioni i komunave me shumicë serbe nuk do të thotë më shumë të drejta për komunitetin serb, por më shumë ndikim të Serbisë mbi territorin e Kosovës”, thuhet në njoftim.
Të enjten në seancën e Kuvendit, kryeministri i Kosovës, Albin Kurti prezantoi gjashtë kushte nën të cilat u shpreh se do të pranonte formimin e Asociacionit. /Teve1.info/