Pas protestave të mbajtura në Shkup dhe Tiranë, edhe në Prishtinë do të organizohet një protestë në mbështetje të përdorimit të gjuhës shqipe në Maqedoninë e Veriut.
Reagimet kanë ardhur pas vendimit të autoriteteve maqedonase për të mos lejuar mbajtjen e provimit të jurisprudencës në gjuhën shqipe, çështje që ka nxitur pakënaqësi te studentët shqiptarë.
Parlamenti Studentor i Kosovës ka bërë të ditur se protesta do të mbahet të premten, duke filluar nga ora 14:00, para Ambasadës së Maqedonisë së Veriut në Prishtinë.
“Ne, studentët e Kosovës, ju ftojmë t’i bashkoheni protestës paqësore para Ambasadës së Maqedonisë së Veriut në Kosovë, për të ngritur zërin kundër cenimit të së drejtës së përdorimit të gjuhës shqipe në provimin e jurisprudencës dhe në të gjitha provimet e tjera shtetërore në Maqedoninë e Veriut.”, thuhet në njoftim.
Organizatorët theksojnë se përdorimi i gjuhës shqipe është një e drejtë themelore dhe jo privilegj, duke kërkuar respektimin e saj në institucionet arsimore dhe profesionale.
“Ne besojmë se arsimi, profesioni dhe e ardhmja e të rinjve nuk duhet të pengohen nga barriera gjuhësore të vendosura padrejtësisht. Prandaj, ftojmë të gjithë studentët, organizatat studentore, shoqërinë civile dhe qytetarët që të bashkohen me ne.”, thuhet në njoftim./teve1.info/
