Studentët e Fakultetit Juridik të Universitet të Prishtinës, janë radhitur të katërtit në botë në garën ndërkombëtare për drejtësi.
Ata kanë arritur në çerekfinalen e garës më të madhe ndërkombëtare për drejtësi , “Philip C. Jessup International Law Moot Court Competition”, të mbajtur në Vjenë të Austrisë.
Studentja e ekipit përfaqësues nga Kosova, Ema Guda, ka arritur të radhitet në mesin e 20 folësve më të mirë të kësaj gare.
Ndërkaq, shkrimtari, Adil Fetahu, ka vlerësuar se televizionet e Kosovës do duhej të transmetonin gjithçka nga kjo garë, por të çuditshëm e pa edhe faktin që Fakulteti Juridik s’ka dhënë asnjë informatë për publikun.
Madje sipas tij, në këtë mënyrë do të demantohej vlerësimi i PISA-s, ku Kosova është radhitur në fund të tabelës.
“Për çudi, televizionet tona që transmetojnë gjithçka që nuk ka vlerë apo nuk interesante për shikuesit, asnjë minutë nuk ia kushtuan këtij ekipi, që na bëri krenar për suksesin e arritur në dije, në gjithë atë konkurencë të fortë, në të cilën marrin pjesë ekipe të universiteteve më prestiçioze të botës. Për çudi, as Fakulteti Juridik nuk ka dhënë ndonjë informatë për publik, për suksesin e ekipit të tij! Kjo aq më tepër, në kohën kur në PISA Kosova radhitet në fund të tabelës, e që këto vajza e këta djelmosha, me dijen e tyre e demantojnë vlerësimin e PISA-s”, ka shkruar Fetahu në Facebook.
Kujtojmë se ky sukses i studentëve nga Kosova erdhi pas atij të regjistruar më 8 mars kur ata arritën të kualifikohen në çerekfinalen e Rundeve Miqësore Evropiane të mbajtura në Bratislavë të Sllovakisë.
Suksesi i studentëve të Fakultetit Juridik në gara ndërkombëtare për drejtësi tanimë është një promovim ndërkombëtar i jashtëzakonshëm i Fakultetit Juridik, dhe Universitetit të Prishtinës./teve1info/.
