Deputetja e Listës Guxo, Jeta Statovci i ka reaguar liderit të LDK-së, Lumir Abdixhiku i cili kritikoi Qeverinë Kurti për mungesë të finalizimit të punimeve nëpër rrugë.
Statovci ka shkruar se disa nga rrugët më të rëndësishme në vend janë nisur pa projekt e pa buxhet.
“Lideri që synon rrugë të re ani pse vjen nga kthinat e rrugëve të vjetra, po të ishte i vërtetë, do t’i shkonte ndërmend të thoshte pak fjalë, për vitet nga 2009 (Mitrovicë, Pejë etj) kur partnerët e tyre i nisën këto rrugë, apo nga vitet 2015 e 2016 (kur rruga e Podujevës filloi) kur prindi i tij politik i nisi ato rrugë, pa shpronësim, pa projekt, pa buxhet, si mos më keq. Por nuk thotë asgjë nga ato sepse ai është thjeshtë një fasadë që mbulon të vjetren brenda për t’u bashkuar me të moçmen, në kërkim të lumturisë me marrëveshjet ndajmë 50:50”, ka shkruar Statovci.
Ajo ka shtuar se qeverisja aktuale të gjitha projektet i ka rishikuar, revidentuar, korrektuar e bërë gati për ekzekutim.
“Rruga për Podujevë ka progres për 2 muaj më shumë se 6 vitet e tyre. Rruga e Gjilanit po përfundon ndërkohë që rrugët që lidhin Gjakovën, rruga Prizren – Prevallë, Dragash- Brod, Gjilan Kllokot po vazhdojnë me ritme të papara ndonjëherë”, ka shkruar ajo.
