Kryeministri britanik, Keir Starmer deklaroi të hënën se Mbretëria e Bashkuar “nuk po mbështet bllokadën” e porteve iraniane, duke nënvizuar se fokusi kryesor i qeverisë është rihapja e Ngushticës së Hormuzit për të ulur çmimet e energjisë.
“Përgjigja jonë është e përqendruar në hapjen e Ngushticës së Hormuzit, sepse kjo është mënyra se si i ulim çmimet e energjisë sa më shpejt të jetë e mundur”, u shpreh Starmer për BBC Radio 5.
I pyetur nëse e konsideron personalisht Donald Trump përgjegjës për ndikimin në faturat e energjisë në Britani, Starmer shmangu një përgjigje të drejtpërdrejtë. Ai theksoi se “gjëja më e rëndësishme” është të bashkohen vendet për të nxitur uljen e tensioneve dhe rihapjen e ngushticës.
Ai shtoi se Irani mban përgjegjësi për kufizimin e trafikut në Gjirin Persik dhe theksoi se Mbretëria e Bashkuar “nuk po përfshihet në luftë”.
Ndërkohë, Presidenti amerikan Donald Trump ka shpallur një bllokadë ndaj porteve iraniane, e cila pritet të hyjë në fuqi të hënën në orën 14:00 GMT.
