Bashkimi Evropian ka përsëritur qëndrimin se përgjegjësit për sulmin ndaj Policisë së Kosovës që ndodhi në veri të vendit, duhet të vihen para drejtësisë dhe të gjitha faktet të verifikohen.
Zëdhënësi i BE-së, Peter Stano, ka thënë se duhet të vërtetoeht se kush i bëri dhe kush i organizoi këto sulme terroriste.
“Hetimet po vazhdojnë dhe ato nuk janë kryer akoma. Ato janë krejtësisht në duart e Policisë së Kosovës, dhe me kërkesë, ata asistohen nga EULEX-i dhe KFOR-i. Duhet të vërtetohet se kush i bëri këto sulme terroriste, kush i organizoi, kush qëndron prapa tyre dhe përgjegjësit të dalin para drejtësisë. Sa i përket përgjegjësisë, mosndëshkueshmërisë, qëndrimi i BE-së është i qartë. Të gjithë përgjegjësit duhet të dalin para drejtësisë dhe këtu nuk ka asnjë dilemë”, ka thënë ai të martën në një konferncë për media.
Në pyetjen se cili do të jetë roli i BE-së për të siguruar që ata që janë në Serbi e që kanë marrë pjesë në sulme, të mos i ikin drejtësisë, Stano ka thënë se, “kontaktet tona me partnerët shkojnë përmes kanaleve përkatëse e jo mediave”.
Të martën ministri i Punëve të Brendshme, Xhelal Sveçla, ka publikuar një video ku në mesin e grupit të armatosur serb, i cili më 24 shtator kreu sulm terrorist në veri, ku një polic i Kosovës mbeti i vrarë, pretendohet se është edhe nënkryetari i Listës Serbe, Milan Radojçiq.
