Zëdhënësi i Bashkimit Evropian, Peter Stano, kërkon nga Kosova që të shmangë veprimet e njëanshme, që sipas tij, mund të rrisin tensionet dhe t’i adresojë këto çështje përmes dialogut të lehtësuar nga BE.
Stano ka reaguar lidhur me mbylljen e komunave paralele serbe në Dragash, Pejë, Istog dhe Klinë, si dhe objektet e OJQ-së Qendra për Paqe dhe Tolerancë në Prishtinë.
Stano ka thënë se mbyllja e këtyre zyrave do të ketë efekte negative në jetën e përditshme dhe kushtet e jetesës së komunitetit serb në Kosovë.
“Mbyllja e papritur e këtyre zyrave do të ketë efekte negative në jetën e përditshme dhe kushtet e jetesës së komunitetit serb të Kosovës, pasi do të kufizojë qasjen e tyre në shërbimet themelore sociale duke pasur parasysh mungesën e dukshme të alternativave në këtë moment”, ka deklaruar Stano.
Ai ka shtuar se statusi i këtyre strukturave është paraparë të zgjidhet përmes dialogut.
“Statusi i këtyre strukturave është paraparë të zgjidhet në dialogun e lehtësuar nga BE-ja, në lidhje me themelimin e Asociacionit/Bashkësisë së komunave me shumicë serbe. Prandaj, BE-ja i kërkon Kosovës që të shmangë veprimet e njëanshme që mund të rrisin tensionet dhe t’i adresojë këto çështje përmes Dialogut të lehtësuar nga BE-ja”.
Kosovo: 🇪🇺 notes with great concern Special Police operations at the offices of Serbia-run institutions. EU urges Kosovo once again to avoid unilateral actions that could raise tensions, and to address these issues through the EU-facilitated Dialogue. https://t.co/FvArYH9Xx2 pic.twitter.com/rWYua85zcn
— Peter Stano (@ExtSpoxEU) February 4, 2024
Dje, edhe ambasadori amerikan në Prishtinë, Jeff Hovenier, tha se veprimet e fundit të Qeverisë së Kosovës, në lidhje me dinarin serb dhe mbylljen e komunave paralele serbe, janë duke rritur panevojshëm tensione etnike dhe si pasojë ia kufizojnë mundësitë Shteteve të Bashkuara për ta mbështetur atë në arenën ndërkombëtare./teve1.info/
