Sindikatat e punonjësve në Aeroportin Ndërkombëtar të Brukselit kanë bërë thirrje për bojkot të fluturimeve drejt Tel Avivit, duke i kërkuar anëtarëve të tyre të refuzojnë ngarkimin, zbarkimin apo shërbimin e çdo fluturimi që lidhet me Izraelin.
Vendimi vjen si një akt proteste kundër luftës së vazhdueshme të Izraelit në Rripin e Gazës dhe përkeqësimit të krizës humanitare në këtë rajon.
Ky veprim vjen në një kohë kur protestat në qytete të ndryshme evropiane janë shtuar ndjeshëm, me qytetarë dhe organizata të shoqërisë civile që kërkojnë fund të menjëhershëm të luftimeve dhe ndihmë të shtuar humanitare për civilët palestinezë.
Në shumë kryeqytete të BE-së janë zhvilluar marshime në mbështetje të paqes dhe ndalimit të ofensivës izraelite.
Ky zhvillim shënon një nga reagimet më të forta simbolike nga punonjës të një sektori kyç evropian ndaj luftës në Lindjen e Mesme dhe vë në dukje presionin në rritje mbi institucionet për të ndërmarrë qëndrime më të qarta përballë krizës humanitare në Gaza./teve1/
