Që nga 8 prilli, propozimi për kryeprokuror të Shtetit, është në presidencë.
Zyra e Presidencës ka filluar me shqyrtimin e propozimit.
Për tëvë1, ky institucion ka thënë që shefja e shtetit së pari do të ketë konsultime para se të marrë një vendim nëse Blerim Isufaj do të jetë pasardhësi i Aleksandër Lumezit.
“Zyra e Presidentes ka filluar të shqyrtojë dhe analizojë në detaje të gjithë dokumentacionin e pranuar, të gjitha faktet dhe rrethanat që ndërlidhen me këtë proces. Presidentja është në komunikim me palët e interesit dhe në ditët ne vijim do të takohet me përfaqësuesit e organizatave që kanë monitoruar procesin e përzgjedhjes se Kryeprokurorit për të dëgjuar vërejtjet e tyre mbi mbarëvajtjen e këtij procesi”, thuhet në përgjigjen e Zyrës e Presidencës për Tëvë1.
Isufaj mori 98 pikë nga 100 sa ishin gjithsej, duke prirë në listën me 4 kundërkandidatë.
Përkundër dyshimeve dhe pretendimeve se procesi ishte zhvilluar me një varg mangësish, KPK-ja, e konsideron si të suksesshëm.
“Meqë Këshilli Prokurorial i Kosovës zhvilloi procedurat e parapara me sukses dhe propozoi për emërim z. Blerim Isufaj për pozitën e Kryeprokurorit të Shtetit, KPK-ja konsideron se tërë procesi ishte në përputhje me aktet ligjore dhe nënligjore në fuqi dhe është përcjellë me objektivet, me transparencë, me gjithëpërfshirje dhe është bazuar në meritokraci”, thuhet në përgjigjen e Këshillit Prokurorial të Kosovës.
Të njëjtit kandidatë mund të garojnë sërish nëse presidentja nuk e dekreton Blerim Isufajn.
Nëse kjo ndodh, Mirvet Thaçi nga IKD, thotë se KPK-ja është përgjegjëse ta vënë dikë përkohësisht në krye të Prokurorit të Shtetit.
Aleksandër Lumezi, më 21 prill e kryen mandatin e tij 7 vjeçar si kryeprokuror, datë pas së cilës do të kthehet si një prokuror në zyrën e Kryeprokurorit të Shtetit.
Raporti i gazetares Florijeta Dernjani.
