Stacioni i Autobusëve në Prishtinë ka reaguar pas raportimeve në media lidhur me rritjen e çmimeve të biletave të udhëtimit, duke sqaruar se nuk ka kompetencë në përcaktimin e tyre.
Sipas njoftimit, vendimi për çmimet e biletave është ekskluzivisht në duart e operatorëve privatë të transportit, të cilët i caktojnë ato bazuar në politikat dhe kostot e tyre operative.
“Stacioni i Autobusëve (SAP) nuk merr pjesë në vendimmarrjen për çmimet e biletave dhe nuk ka rol në përcaktimin apo ndryshimin e tyre”, thuhet në reagim.
Po ashtu, SAP ka theksuar se çdo ndryshim i çmimeve reflekton vendimet e operatorëve të transportit dhe jo të vetë stacionit.
