Autori: Jona Kelmendi
Në prag të raundit të dytë të zgjedhjeve, në Komunën e Kllokotit, është shënuar një ndryshim në skenën politike atje.
Sreçko Spasiq, që më parë garonte kundër Listës Serbe, tani i është bashkuar asaj.
Bashkë me të, edhe anëtarët e nismës së tij janë bërë pjesë e kësaj partie.
Në lidhje me këtë zhvillim, ka reaguar edhe Arbër Emini, kryetar legjitim i shqiptarëve në Kllokot nga Lëvizja Vetëvendosje.
“Kalimi i Sreçko Spasiqit në Listen Serbe ka qenë i pritur nga ana ime por edhe nga ana e gjithë qytetarëve të Kllokotit edhe pse tash ata ndjehen të mashtruar nga ai dhe komuniteti shqiptarë dhe serb qe e kanë votu kundër listës serbe por ka qenë një vendim i pritur nga ana ime se edhe ne momentin kur ka kandidu ka kandidu me mbështetje te strukturave ilegale të Serbisë, Vuçiqit dhe Milan Rajdoqiçi”, ka thënë Emini.
Emini ka treguar për Tëvë1, që sot kanë bërë një ankesë lidhur me këtë në Komisionin Qendror të Zgjedhjeve në emër të të gjitha partive politike në Kllokot.
“Ankesa është në emër të gjitha subjekteve politike, partive politike në Kllokot dhe si përfaqësues legjitim i tyre kam kërkuar dhe kemi kërkuar nga KQZ sot që me deçertifiku kandidatin Sreçko Spasiq për arsye se nga sot ai është kryetar i komunes ilegale të komunës së Vitis në Kllokot, pra tani Kllokoti ka dy kryetar Bozidar Dejanoviç nga lista serbe dhe Sreçko Spasiq si kryetar i komunës paralele dhe ligjet në fuqi të Republikës së Kosovës e ndalon çdo kandidim për persona të cilët janë në struktura ilegale të jenë kandidatë në komunën e Kllokotit”, është shprehur tutje Emini.
Sipas Eminit ai pret që KQZ të deçertifikoj së më shpejtë ish- kandidatin në fjalë, sepse në të kundërt nuk mund të ketë balotazh me një kandidat.
Ndërkohë, Komisioni Qendror i Zgjedhjeve ka bërë të ditur se tërheqja e tij nuk ndikon në procesin zgjedhor, pasi afati ligjor për tërheqje të kandidatëve ka përfunduar më 2 shtator.
