Më shumë se katër vjet pas njoftimit fillestar, Spotify ka filluar të prezantojë për përdoruesit Premium opsionin e transmetimit audio pa humbje.
Në një njoftim të bërë sot, kompania konfirmoi se funksioni ka nisur të shpërndahet në disa rajone dhe do të jetë falas për abonentët.
Për të dëgjuar këngë në cilësi të plotë pa humbje, përdoruesit duhet të shfrytëzojnë Spotify Connect ose kufje që lidhen përmes kabllos (analog ose USB). Në anën tjetër, Bluetooth nuk mbështetet.
Me sa duket, “shumë pajisje” me Spotify Connect tashmë e mbështesin këtë cilësi, përfshirë markat Sony, Samsung, Bose dhe Sennheiser, ndërsa pajisjet e Sonos dhe Amazon pritet të marrin mbështetje gjatë muajit të ardhshëm.
“Për përvojën më të lehtë dhe më të mirë të dëgjimit, ne rekomandojmë transmetimin e muzikës pa humbje nëpërmjet Wi-Fi, duke përdorur një kabllo kufjesh ose altoparlantë në një lidhje jo-Bluetooth, siç është Spotify Connect. Aktualisht, Bluetooth nuk ofron bandwidth të mjaftueshëm për të transmetuar audio pa humbje, kështu që sinjali duhet të kompresohet para se të dërgohet.”, tha Spotify.
Sipas kompanisë, kur aktivizohet ky funksion, muzika transmetohet në formatin FLAC 24-bit/44.1 kHz, që paraqet një përmirësim të dukshëm krahasuar me cilësimet aktuale të cilësisë, edhe pse nuk arrin nivelin e ofruar nga disa konkurrentë. Për shembull, Tidal mbështet FLAC 24-bit/192 kHz në transmetimin e tij HiRes.
Spotify kishte njoftuar për herë të parë mbështetjen për këtë cilësi të avancuar në vitin 2021, duke e quajtur funksionin “HiFi”.
Shërbimi shtesë ishte parashikuar për vite me radhë, por lançimi i tij u shty disa herë, me aludime se do të kushtonte 5 dollarë shtesë në muaj. Megjithatë, në formën përfundimtare ky funksion po ofrohet pa kosto shtesë për abonentët Premium.
